Home / දෙයියෝ සාක්කි / කෑගහන ‘මවුසයෙන්’ නිවැසියෝ හොල්මන් වෙති

කෑගහන ‘මවුසයෙන්’ නිවැසියෝ හොල්මන් වෙති

2018-04-24 10:37:00       552
feature-top
කුලියාපිටියට නුදුරු තාක්‍ෂණය උපරිමයෙන් භාවිත කරන එක්තරා නිවසකි. ආරක්‍ෂිත කැමරා සවිකොට තිබූ එම නිවසේ කැමරා උපකරණයක මතු වූ යම් කාර්මික දෝෂයක් නිවැරදි කිරීමට පැමිණි කාර්මික ශිල්පියා නිවැසියන්ගෙන් පරිගණක මූසිකයක් (මවුස් එකක්) විමසා සිටිනමුත් අදාළ නිවසේ තරුණයා නොමැති හෙයින් මවුසයක් ඉල්ලා ගැනීමට යාබද නිවසට යාමට සිදුවිය.

එම නිවසෙහි ද ඒ මොහොතේ සිට ඇත්තේ මව පමණක් වුවත් මවුස් යැයි කී පමණින්ම ‘ආ ඉන්නකො මම පොළෙන් අපේ මිනිපිරියට ගෙනැවිත් දුන්නා’ යැයි කියමින් නිවසේ සෑම අස්සක් මුල්ලක් නෑරම සොයන්නට වූවාය. සොයමින් යන අතරමගදී ‘ඒකට නමට තව කෑල්ලක් තියනවා නේද?’ යැයි විමසමින් සෙවීම අත් නොහැරියාය.

කෙසේවෙතත් බොහෝ වේලාවක් මවුසය සොයමින් සිටියදීම කාර්මික ශිල්පියා ද එම නිවසට පැමිණ සෙවීම අපහසුනම් වෙනත් වේලාවක පැමිණෙන බව දන්වමින් පිටත්වන්නට සූදානම් වූ අවස්ථාවේදීම නිවෙස් හිමි කාන්තාව සතුටින් කෑගසමින් ‘මෙන්න හම්බුණා මේක මමමයි අපේ මිනිබිරියට සති පොළෙන් ගෙනත් දුන්නේ’ යැයි කියමින් මිරිකීමේදී කෑගැසීමේ හඬ නිකුත් වන මිකී මවුස් කෙනෙක් ගෙනැවිත් දී ඇත. නමට තවත් කෑල්ලක් තියනවා යැයි සිතන්නට ඇත්තේ ‘මිකී’ යන කොටස විය හැකි යැයි පිරිසට තේරුම් ගැනීමට ද මහ වේලාවක් නොගියේය.

පසුව කරකියා ගන්නට කිසිත් නැති වූ කාර්මිකයා සහ සී.සී.ටී.වී. නිවසේ කාන්තාව සිනහව තද කරගෙන අදාළ අසල්වැසි කාන්තාවට කරුණු වටහා දී පිටත්ව ඇත.

උපුටා ගැනීම ලංකාදීප පුවත්පත ඇසුරෙනි

More News »