Home / දෙයියෝ සාක්කි / අලූත් අවුරුද්ද අස්සේ ගානක් කපන ගේමක් ගහලා

අලූත් අවුරුද්ද අස්සේ ගානක් කපන ගේමක් ගහලා

2018-04-18 10:37:00       368
feature-top
අවුරුදු සිරිත් විරිත් අනුව නිවෙස අලෙවි කිරීමද එක් චාරිත‍්‍රයකි. එහෙත් එය අවුරුදු නැකතට එක් පුද්ගලයෙකු එක් වරක් පමණක් කරන දෙයකි. එහෙත් අතේ මිටේ මුදල් ගැවසෙන මිතුරන් කීප දෙනෙකුට කියා අනිකාට නොදැනෙන සේ දවස තිස්සේම නිවස අලෙවි කරවා ගන්නා පුද්ගලයකු පිළිබඳව ඌව පළාතේ නිවෙසකින් අසන්නට ලැබුණි.

නිවෙස අලෙවි කිරීමෙන් පසුව ඔහු අතින් නිවෙසේ සියලූ දෙනාටම බුලත් කොළයක තබා මුදල් දීම සිදු කෙරේ. මේ නිවෙසේ හිමියා මෙය ඉලක්ක කරගෙන කීප දෙනෙකුටම කියන්නේ එමගින් වැඩි මුදලක් සොයා ගැනීමටය. ඔහුගේ නිවෙසට යන හිතවතකුට තවත් හිතවතෙක් අතරමඟදී මුණ ගැසුණි.

‘මම ගියා අහවලාගෙ නිවෙස අලෙවි කරන්න’ ‘ආ මමත් යන්නෙ ඒකටම තමයි’ ‘එතකොට අපි දෙන්නටම ඒක කියල ද’ දෙදෙනාම පුදුම වූහ. කෙසේ වෙතත් ඔහුද අදාළ මිතුරාගේ නිවසට ගොස් සංග‍්‍රහ භුක්ති විඳීමෙන් පසුව ගෙහිමි මිතුරා බුලත් කොළ කිහිපයක් මිතුරාට දී ‘දැන් ඉතින් අත අලෙවි කරගන්නත් ඕනෑ ඔහේටම කියලා. එන්න නෝනා... එන්න පුතා.. එන්න දුව... මේ මාමගෙන් ගනුදෙනුවක් කරල අත අලෙවි කර ගන්න’.

මිතුරාට සිනහ පහළ විය ‘තව කී දෙනෙක් මේ ගේ අලෙවි කරන්න එන්න ඉන්නවද?’ විහිලූවට මෙන් එසේ කියා මුදල් නෝට්ටුව බැගින් ඔවුන් අත තබා සිනහසෙමින්ම නිවසෙන් පිටවී යද්දී ඔහුට හීං දාඩිය දැම්මේය. ‘හත්තිලව්වයි.... එහෙනං වැඬේ මාට්ටුවෙලා’ ගෙහිමියා සිය බිරිඳ සමග කීවේය.



උපුටා ගැනීම ලංකාදීප පුවත්පත ඇසුරෙනි

More News »